主辦機構
-02.png){kind=small}
捐助機構
香港公屋記事
香港公屋記事
「老公行船通常一行就三四個月， 靠老公寄錢返嚟。有一次喺滙豐銀行拎老公寄返嚟嘅錢，𡥼住個仔，咁就畀個男人追住搶錢，之後就一路走一路嗌，好彩有個師奶咁啱聽到我嗌，出嚟幫手，好彩都冇事，最後買返啲生果多謝返個師奶。」
馮太，彩虹邨街坊
「前幾年由古洞啲村屋搬入嚟，第一次上樓住，對比起以前，環境就嘈啲囉。……另外條邨嘅廁所水，有時沖完會回流。屋企人住喺同一幢比我哋高十層，一樣有咁嘅問題。我本身都唔為意。……投訴完好似好啲，之後佢哋話有幾種方法幫我整，……但最後都冇整，都唔知要搞幾耐，可能有排搞。」
莊先生，寶石湖邨街坊
「細細個住太和邨，一有時間，就落去下面間麥當勞個遊樂場玩。佢嗰度有繩網、瀡滑梯嗰啲，因為免費入場，所以成日都會落去同人玩。不過一讀到中學嗰時就冇再去，依家啲設施都唔同晒，冇以前咁好玩囉。」
鄭先生，太和邨舊街坊
「邨以前有個好出名嘅傻佬，佢留到啲鬚好長，最鍾意喺邨入面唔同地方不斷來回行嚟行去，細個喺麥當勞食嘢見佢喺入面圍住啲枱行咗十幾廿個圈，近呢十幾年佢好似好返好多，又剃咗啲鬚。」
陳小姐，博康邨街坊
「細個有一次同住樓上個小朋友玩，突然想學人玩野餐，所以就去拎人哋門口啲地氈當野餐墊，周圍搵啲大塊嘅地氈，點知唔小心拎埋人哋對鞋，搵唔返係邊一戶，所以就掉咗對鞋落街。」
「以前未起廣福邨之前，近吐露港一帶有唔少漁民住喺水上棚屋，後尾填海，佢哋有啲漁民就搬咗入廣福，有時佢哋結婚都會跟返水上人啲儀式，聽到佢哋喺樓下又唱歌又跳舞。」
郭小姐，廣福邨街坊
婦女穿上傳統服飾跳著「陸上行舟」。（攝於2013年大埔天后寶誕祈褔巡遊）
「重建咗好耐，我嗰時就住喺三十二座，即係依家龍泰樓個位，住嗰時都未分黃大仙上下邨。當時徙置大廈嘅租金都係十蚊一個月，中間個位就係啲公共廁所、水喉咁。但係我嗰幢兩邊嘅頭尾單位就好唔同，室內空間大好多，有梗房、騎樓同廚廁，好似啲獨立屋咁，但租金就要四十五蚊一個月。所以嗰時都稱佢哋幾戶做『有錢佬』。」
鍾先生，昔日黃大仙徙置區住戶
「我同我最好嘅朋友既係鄰居又係同學：最初喺恆月樓間幼稚園一齊讀書，一直到小學、中學、大學都係同學，由細到大都會約埋喺樓下一齊返學，有時放學唔想咁早返屋企就會喺樓下公園玩或者涼亭傾心事……同佢仲親過自己個妹呀，屋企人都當佢係自己人咁，成日叫佢上嚟飲湯食飯，仲好過對我。」
余小姐，恆安邨街坊
「天水圍開發初期，好多學校搬咗入去，每朝由元朗入天水圍嘅輕鐵都塞滿人，起碼要等三班車先上到。個月台又係企滿人，我見過有學生喺月台畀人迫到跌咗落路軌，佢爬返起身然後行返去行人過路處，又再繼續上返月台等車。我哋細個個書包好重，月台又多人，沿住月台邊行，真係撞一下都畀個書包墜咗落去。迫成咁點上車呀，我就醒目呢，梗係反方向搭回頭車啦，仲有位坐添呀！」
伍小姐，天慈邨街坊
羅先生，沙角邨街坊
「個冬菇亭變晒啦，同禾輋嗰個同一命運。佢要裝修，搞到靚靚仔仔，又唔再畀餐廳行啲枱櫈出嚟，都冇咗以前冬菇亭嗰種味道。嗰時有間任飲任食嘅打邊爐，應該無咩區內人唔識。以前一大班朋友聚會就會去幫襯，貪佢好平，又坐得多人。……仲有一間糖水舖都會成班Friend一齊去食宵夜。其實諗返起冬菇亭啲嘢食唔係話特別好食，但真係有種氣氛，夜晚又可以聚下腳傾計。」
（攝於2010年，圖片由羅先生提供）
