公屋_Website_4.jpg

華富邨

華富邨
難以代替的鄰里情懷──李太

穿著拖鞋趕忙從遠處跑來,熱情地打招呼:「本身諗住著波鞋,但係街坊要有返個街坊look㗎嘛。」李太就是這樣,初次見面就令人印象深刻。2005年結婚後與丈夫和老爺同住華生樓,並誕下第一個孩子。大概六年後便獲「特快公屋編配計劃」編配現時居住的華泰樓單位:「我先生對華富邨情有獨鍾,覺得返工近,因為佢喺魚市場工作,所以最後我哋都係揀返華富邨,可以近啲老爺。」現時育有三個兒子,李太笑稱:「呢度好旺丁㗎!我識嘅朋友喺度最少生兩個。」李太娓娓道來。

華富邨-2.jpg
天井內的熱鬧氣氛

 

人口老化是許多舊屋邨的共通點,華富邨亦不例外,於千禧年代搬入華富邨,李太一家算是年輕家庭,周邊鄰居較多長者,李太坦言有小朋友後拉近了與鄰居的距離:「好多都係睇住我馱,睇住我生,見返我大仔都話『嘩,你已經咁大個喇!』」李太一家搬進來,年幼的孩子難免會在走廊追逐玩耍,鄰居不但沒有嫌棄,而且無任歡迎:「以前嗰代小朋友喺門口跑嚟跑去,但依家冇晒喇,個個都係玩電話,所以當我啲小朋友嚟到跑的時候,佢哋就話『哎呀,好似以前呀!』佢哋好鍾意,覺得以前嘅感覺返晒嚟。」鄰里間的包容和體諒讓孩子有空間可以自由地四處探索,也許這便造就了邨內小孩特別活潑的特質。與李太在邨內遊走,閒談間不時有出來玩耍的孩童主動與她打招呼,她表示在這裏居住的小孩尤其可愛,而這便是令她喜歡華富邨的原因之一。

鄰里間的相互守望則是李太喜歡華富邨的另一原因,她說:「落雨收衫,見住嚿雲飄過嚟就喺天井嗌落去:『落雨呀,收衫呀!』如果鄰居出咗街隔籬屋會幫手收埋㗎,收咗咪等佢返屋企再畀返佢囉。」有一次颱風天,李太一家剛好去了旅行,鄰居便有默契地幫忙收起他們擺放於家門外的鞋子。提起華富邨即將重建,李太感慨地說 :「我唔知將來拆咗再搬,會唔會有返一班咁好嘅鄰居,唔介意嘈,落雨幫你收衫。華富邨呢種舊式井字型樓宇結構就係大家望到內庭望到對方,可以嗌收衫,呢啲就係呢度獨有嘅嘢,感覺上將來『新華富』唔會再有。」

20211124港文化港連結2021公屋生活文化華富邨wwk-2992.jpg

不少孩童在遊樂場各自玩耍,大人則在附近聊天。

20211124港文化港連結2021公屋生活文化華富邨李太wwk-3105.jpg

行經熟悉的雜貨店,李太與店舖職員熟稔地打招呼。

20211124港文化港連結2021公屋生活文化華富邨wwk-3006.jpg

華富邨的建築特色之一:每幢大廈都有多個出入口,四通八達。

20211124港文化港連結2021公屋生活文化華富邨wwk-3036.jpg

華富邨獨特的建築特色與人們的生活習慣融合,形成獨特的風景。

從不喜歡到不捨 只因人情味

提起邨內的大小事,李太總是滔滔不絕,殊不知原來她曾經不喜歡住在華富邨。主要是因為交通問題,往日每天乘搭巴士到銅鑼灣上班,總會塞車。最初聽到華富邨要重建,她喜多於憂,隨著日子累積,她漸漸心生不捨:「初初聽到話要拆好開心㗎,有新樓住呀嘛!但住耐咗,份人情味喺其他地方搵唔到,依家覺得好傷感。」結婚前與家人住在調景嶺的屋邨,邨內商店由領展管理,她覺得設施雖然較新穎,也應有盡有,但總是缺少一點人情味。而且,住到華富邨後亦令李太無意中尋回了那份失落已久的互信:「有次我屋企嘅工人姐姐落去買嘢,佢帶唔夠錢,個阿姐話『得啦,下次叫你老闆畀返啦!』係呢啲老店先有呢種人情味,差幾蚊唔會同你計較。」

20211124港文化港連結2021公屋生活文化華富邨wwk-3094.jpg
20211124港文化港連結2021公屋生活文化華富邨wwk-3083.jpg

超過五十年歷史的華富邨仍有不少一同見證時光的老店。

20211124港文化港連結2021公屋生活文化華富邨wwk-3208_edit

瀑布灣以其瀑布命名,也是附近著名的景點。

漫步華富邨,從邨內的交通、學校、店舖的職員,李太無所不談,雖然婚後才住進華富,但對邨內各事瞭若指掌,彷彿從小就居住於這裏,沿途她逐一介紹:「佢會問你要唔要多飯?佢成日驚人哋食唔飽……呢間舖又係好得意,鍾意就開,有緣就會見到佢開門。」一直以來,華富邨被外界喻為平民豪宅,周邊亦不乏高級住宅樓盤,李太開玩笑說:「我隔籬就係貝沙灣,我成日同人講我住喺貝沙灣㗎,隔籬咋嘛,我交千幾蚊租就可以望同一個景。」

20211124港文化港連結2021公屋生活文化華富邨李太wwk-3114.jpg

李太最引以為傲的就是華富邨擁有足以與附近豪宅匹敵的海景。

重建在即 一切恐成追憶

言談間少不免提及對華富重建的感受,李太表示:「最唔捨得嘅就係一班鄰里街坊。第日真係拆咗,大家搬去唔同地方,真係會搵唔返個聚腳點。」可見,現時融洽的鄰里關係影響著她計劃新生活時的考量,鄰居間的相處成為了她最為重視的一環。平日於邨內走逛,街坊們總會在某處相遇相聚,不需要約定時間,也不需要特意聯絡。李太深怕日後重建後,一切將會面目全非:「有時我會諗,呢度拆咗之後,啲街坊會去邊度坐呢,仲會唔會再好似依家咁……」作為三子之母,李太也很關心邨內學校的去向,但有些決策並不由學校主導,現時一切都只是紙上談兵,她無奈地說:「華富邨之後會起啲咩?我哋聽返嚟嘅好似傳言咁,所有聽返嚟嘅資訊,改完又改,變完又變,真係要等拆咗我哋先會知道呢個華富邨會變成點。」華富邨跨越半世紀的璀璨歷史,記錄了幾代人的成長故事,無論將來日子如何,相信這份濃得化不開的人情味總會留在李太和一眾街坊的心中。

WhatsApp Image 2021-11-25 at 11.25.39.jpg
WhatsApp Image 2021-11-25 at 11.25.39 (1).jpg

華富邨五十周年的紀念杯上印有當年落成前的設計圖。

WhatsApp Image 2021-11-25 at 11_edited.j

中秋節當天李太與鄰居一同在天井掛上傳統紙燈籠歡度佳節,讓一些本來不熟絡的鄰舍也打開門交流,拉近了彼此間的距離。